霧の向こうでたくさんの星に願いを。

生日快樂。

呢句話而家變成我最想同你說嘅嘢，你應該知點解。

我估我想講呢句嘅心情應該同你當時一樣啩。

唔知你會唔會明白我呢。

唔知你仲會唔會掛住我呢。

其實今年都有Clint Eastwood嘅電影，你知我一向鍾意自己搞啲【傳統】來遵守，而且今年套戲嘅內容仲同你有啲似添，本來爭啲就去睇㗎了。

不過最終都係揀咗Dark Waters，因為同我比較有關啊嘛。

我而家學緊化學啊，就係之前你想我學嗰種，驗吓血啊驗吓毒啊乾乾淨淨嗰種。

我之前仲有講過唔想讀博士讀埋碩士就算，你聽到唔知會唔會嚇死hhh

你真係錯過咗好多嘢啊。

前嗰幾年我仲想以後見到你我一定要問你後唔後悔，就算明知你會傷心都好。

而家我覺得我應該知嗰答案係咩，算啦放過你啦。

不過都有可能係我以為我知？

算啦都係等見到你先再決定問唔問啦。

啊，候選仲有They Shall Not Grow Old，但係你又未死我驚睇呢嗰會唔會唔吉利都係算了hhh

只要你好我就乜都可以信，就算我學理學文學乜都好啦。

但係我又實在唔知乜嘢真係如果我信就可以幫到你，冇計只可以信自己啦。

生日又好聖誕又好新年又好流星又好，由嗰陣到而家，都咁耐啦，我乜嘢願望都俾嗮你啦。

你知我自私㗎，但係我而家真係好誠心嘅啦，次次都幫你求咗先。

都唔靈嘅。

前嗰排又因為處理你啲嘢，媽咪終於承認我係成熟嘅成年人啦XDD

我哋都一致認為你未係真嘅成年人，冇錯係我講嘅，以後見到你我一樣會講，你未夠班啊hhh

你都算係幸福㗎啦。

你睇吓我，睇吓其他人，邊嗰有機會好似你咁，咁大個人仲可以唔生性。

以前我會希望你同我掛住你一樣掛住我。

不過而家我慢慢接受到，無論你點掛住我、掛住我幾多都好啦，只要你掛住我就得啦。

以前我會想要求你用我想你愛我嘅方式來愛我。

唔知幾時開始我接受咗囉，我知你愛我就得啦。

記唔記得一日一個蘋果嘅故事？

以前我唔係話有乜用咩，而家我會想多謝你，仲諗住如果我有能力嘅話俾返你添。

我係咪成熟咗好多咧XDD

但係而家好似除咗我之外真係冇人愛你啦。

我講嘅係真係為你好嘅嗰種愛你。

你愛嘅人，有啲就以為愛你、幫緊你，其實冇停害緊你，仲害埋我哋。

有啲就憎你，甚至有時恨不得你死鬼咗佢唔好累人累物，因為覺得你好自私根本就係最愛自己。

你都唔知我要balance呢班人有幾咁辛苦，一個二個真係...有時我覺得不如我死鬼咗佢真係冇眼睇。

其實一開始我都以為我唔掛住你或者憎你就唔會咁唔開心。

試過唔掛住你，其實都幾work㗎，因為你知啦我冇心冇肺嘅hhh

有時真係忙得滯，或者而家年紀大咗記憶力唔係幾好，就會唔記得咯。

憎你就真係一直都做唔到囉。

我真係信你話我係呢嗰世界上係你最錫嘅人㗎。

次次有人咒你，我都偷偷私戥你傷心。

前嗰幾年我有諗過放撇，等你以後見到我傷心後悔。

都有諗過我死咗唔洗理就好啦。

不過而家我想努力啲、變得好啲，等你到時見到我後悔冇見住我大睇住我變叻變靚囉XDD

哈哈諗起今日仲同嗰friend講由細到大同你嗌交冷戰未輸過。

其實呢舖你同我曬冷，我到家陣都算係用嗮啲辦法啦。

算啦我而家係大人啦，唔同你計較。

你呀，突然發現我而家同你生我嗰陣時差唔多大啦，你都就嚟五廿勾啦，幾時識諗啲啊。

你已經miss咗我哋好多嘢啦，唔好再搞到我哋等咁耐啦。

其實而家搞成咁，我都唔知其他人願唔願意原諒你㗎，我只可以代表我自己囉。

你知啦，本身我就唔想結婚㗎啦，又俾你咁嚇法，想結婚都幾難。

但係點都好啦，我都係想以後萬一要嫁人嗰陣你可以拖我手囉。

好啦好耐無想同你傾咁多嘢啦。

之前忍住又好，唔想諗又好，而家都講得七七八八啦。

再唔瞓聽日要做啲嘢就做唔嗮啦。

就講到呢度先啦。

拜拜。